Kryetari i Këshillit Kombëtar Shqiptar, Ragmi Mustafi ka deklaruar se edhe pas një dekadë të marrëveshjes së Brukselit mes Kosovës dhe Serbisë, shqiptarëve në Luginën e Preshevës nuk i solli paqen, stabilitetin dhe prosperitetin edhe pse konsideroheshin peng mosmarrëveshjeve Kosovë-Serbi.
Postimi i Ragmi Mustafit:
Edhe pas një dekadë të marrëveshjes së Brukselit mes Kosovës dhe Serbisë, shqiptarëve në Luginën e Preshevës nuk i solli paqen, stabilitetin dhe prosperitetin edhe pse konsideroheshin peng mosmarrëveshjeve Kosovë-Serbi.
Shqiptarët në Luginë vazhdojnë të përballen me shtypjen dhe diskriminimin që i ka dhunuar edhe aftësinë e tyre për të ushtruar të drejtat themelore.
Liria, siç përkufizohet si fuqia apo e drejta për të vepruar, shprehur apo menduar ashtu siç dëshiron pa pengesa apo kufizime, është diçka që shqiptarëve në Luginën e Preshevës i është mohuar.
Rezistenca kundër nënshtrimit ndaj dominimit të kryeqendrës apo pushtetet madje despotike janë element kyç nga i cili shqiptarët në Luginë duan të kenë kontroll mbi fatin e tyre.
Për më tepër, liria në kontekstin e shqiptarëve në Luginë është arsyetuar shpeshherë me mungesën e formave primordiale të skllavërimit. Andaj, jo rrallëherë mundësia për të lëvizur lehtë dhe për të qenë fizikisht i pakufizuar në lëvizje nuk është vështruar në kuadër të lirisë, por të dëbimit.
Shtypjes dhe diskriminimit me të cilin përballen shqiptarët në Luginën duhej t’i jepej udhë duke e trajtuar në këtë marrveshje. Nuk ndodhi. Gabim. Dështim.
Shqiptarët e Luginës duhet dhe do ta fitojnë lirinë që u nevojitet për të ushtruar plotësisht të drejtat e tyre si qytetarë, ku çdo individ është në gjendje të veprojë, të flasë dhe të mendojë pa pengesa ose kufizime, të ndjekin qëllimet dhe aspiratat e tyre pa u frenuar.