Sot në hapësirat e Kuvendit komunal të Komunës së Bujanocit, është mbajtur seanca e pestë të Shtabit për situata të jashtëzakonshme.
Në këtë mbledhje është shqyrtuar raporti i shtëpisë së shëndetit në Bujanoc mbi situatën epidemiologjike në vend, e që si rezultat, drejtoresha e këtij institucioni dr.Daliborka Pavloviq ka propozuar largimin e gjendjes së jashtëzakonshme, bëhet e ditur përmes një njoftimi në faqen e Komunës së Bujanocit në rrjetin social facebook.
Me përkrahjen e të gjithë anëtarëve të Shtabit komunal për situata të jashtëzakonshme është aprovuar propozimi i drejtoreshës së shtëpisë së shëndetit për heqjen e situatës së jashtëzakonshme në Bujanoc, vendim i cili është marrë më 17.07.2020.
Edhe pse Shtabi për situata të jashtëzakonshme ka vendosur të i japë fund situatës së jashtëzakonshme në Bujanoc, masat për luftimin e shpërndarjes së pandemisë Covid19 të përcaktuara nga Qeveria e Serbisë vazhdojnë të mbeten në fuqi, thuhet në këtë njoftim.
Në vijim mund të lexoni njoftimin e plotë të Komunës së Bujanocit nga mbledhja e sotshme e Shtabit komunal për gjendje të jashtëzakonshme, të publikuar në faqen e komunës në rrjetin social facebook:
Hiqet situata e jashtëzakonshme në Bujanoc
Në seancën e pestë të Shtabit për situata të jashtëzakonshme të mbajtur sot më 22.09.2020 është shqyrtuar Raporti i Shtëpisë së Shëndetit në Bujanoc mbi situatën epidemiologjike në vend. Me propozim të drejtoreshës dr. Daliborka Pavloviq është aprovuar nga të gjithë anëtarët e shtabit heqja e situatës së jashtëzakonshme në Bujanoc e sjellur me datë 17.07.2020, derisa masat tjera të vendosura nga Shtabi Republikan mbeten ende në fuqi.
Gjithashtu, në këtë seancë u shqyrtua dhe u aprovua kërkesa e NP “Komunalia” për ndihmë financiare prej 500.000 dinarëve për zgjidhjen e problemit të deponisë në Bujanoc.