Sot është zhvilluar Seanca e IV-të e Këshillit Kombëtar Shqiptar, ku janë trajtuar disa pika me rëndësi për komunitetin shqiptar në Luginën e Preshevës.
Në qendër të diskutimeve ishte votimi i Programit për shpërndarjen e Fondit të Qeverisë së Kosovës, si dhe përgatitja e thirrjeve publike për projekt-propozime që do të mbështesin fushat që lidhen me identitetin kombëtar shqiptar.
Me iniciativën dhe propozimin e kryetarit të Këshillit, Enkel Rexhepi, u miratuan komisionet vlerësuese, të cilat përbëhen nga profesionistë të fushave përkatëse dhe persona me integritet të lartë nga Lugina e Preshevës.
Gjithashtu, u votua edhe komisioni vëzhgues, që do të kujdeset për mbarëvajtjen dhe transparencën e procesit.
Kryetari i Këshillit Kombëtar Shqiptar, Enkel Rexhepi, theksoi se Këshilli do të vazhdojë angazhimin për të sjellë më shumë mbështetje nga Kosova dhe Shqipëria në Luginë, me qëllim të forcimit të identitetit kombëtar dhe përmirësimit të kushteve për komunitetin shqiptar.