Ambasadori amerikan në Beograd, Christopher Hill, nga Bujanoci ka thënë se dialogu mes Kosovës dhe Serbisë nuk ka të bëjë me çështjen e shqiptarëve në Serbi, por vetëm zgjidhjen e problemeve mes Prishtinës dhe Beogradit.
“Duhet të jem shumë i qartë kur them se dialogu në Bruksel ka të bëjë me zgjidhjen e problemeve ndërmjet Prishtinës dhe Beogradit. Qëllimi i dialogut nuk është që të zgjidhen ndonjë çështje tjetër, çështjet e pakicave këtu apo në pjesët tjera të vendit,” – ka thënë Hill, transmeton portali Bujanovaçke.
Hill ka thënë se se çështja e minoritetit shqiptar në Serbi është çështje e shtetit të Serbisë dhe nuk ka të bëjë asgjë me dialogun mes dy vendeve në Bruksel.
Ai ka thënë se Amerika mbështet dialogun dhe marrëveshjen e arritur në Ohër, ku ka përsëritur se “pjesë e rëndësishme e së cilës është themelimi i Asociacionit”.
“Marrëveshja e arritur nuk ka ndërmend të kalojë kufijtë.” – ka thënë ai.
Më tej, ai ka komentuar letrën e kongresmenëve që ia dërguan Sekretarit Antony Bliniken që edhe në Serbi të formohet bashkimi i komunave shqiptare, duke thënë se një komunitet i tillë nuk është pjesë e marrëveshjes së Brukselit.