Pas shpalljes së zgjedhjeve lokale nga ana e kryetares së Kuvendit të Sërbisë Maja Gojkoviq, subjektet politike shqiptarë në komunën e Bujanocit tashmë i kanë publikuar emrat e kandidatëve të mundshëm që do garojnë për pozitën e kryetarit të komunës.
Kandidaturën për kryetarë të Komunës e para e ka shpallë dega e Alternativës për Ndryshim në Bujanoc përmes një video postimi ku vetë kryetari i degës së APN-së në Bujanoc, Arbër Pajaziti, i cili ka njoftuar se është kandidat i APN-së për pozitën e të parit të komunës në zgjedhjet pasuese lokale që do të mbahen më 26 prill 2020.
Përveç APN-së, pas shpalljes së zgjedhjeve lokale, dega e Partisë për Veprim Demokratik në Bujanoc ka njoftuar se në një atmosferë të jashtëzakonshme në Kuvendin e degës së PVD-së në Bujanoc, janë pajtuar që kandidati i PVD-së që garon për pozitën e kryetarit të komunës në Bujanoc të jetë Driton Rexhepi.
Partia Demokratike në Bujanoc gjithashtu ka njoftuar se kryesia e kësaj partie ka nominuar kryetarin e partisë, Nagip Arifi, që të jetë kandidat për pozitën e kryetarit të komunës së Bujanocit në zgjedhjet lokale të 26 prillit.
Lëvizja e Progersit Demokratik në Bujanoc, në zgjedhjet lokale do të garojë me listën të cilës do të prijë kryetari i kësaj partie, Shqiprim Musliu, i cili është edhe kandidat për kryetar të komunës së Bujanocit, derisa Unioni Demokratik Shqiptar në Bujanoc ende nuk kanë bë të ditur se a do të garojnë të vetëm në këto zgjedhje apo do të vazhdojnë traditën duke qenë pjesë e listave të partive më të mëdha në Bujanoc siç janë PVD dhe PD.