Autoritetet irlandeze kanë zbuluar një kamion tjetër me 16 emigrantë të paligjshëm që po përpiqeshin të hynin në portin e Rossiare nëpërmjet anijes Stena Horizon.
Sipas të dhënave të Euronews Albania, kamioni ishte ngarkuar në anije në një port në Francë dhe kishte destinacion Irlandën .
Emigrantët, origjina e të cilëve nuk dihet akoma, u zbuluan rastësisht gjatë një kontrolli rutinë. Autoritetet kanë nisur hetimet, duke marrë në pyetje shoferin e kamionit dhe ekuipazhin e anijes së udhëtarëve dhe mjeteve.
Ministri për Drejtësinë dhe Barazinë, Charles Flanagan, tha të enjten se ishte shumë i shqetësuar dhe kërkoi bashkëpunimin e qytetarëve për këtë incident.
Zbulimi i rradhës së emigrantëve që përdorin mënyra të tilla udhëtimi drejt vendeve perëndimore, vjen ndërkohë që trafikimi i njerëzve në kontinent është kthyer në vëmendje të autoriteteve më të larta të Bllokut.
Vetëm pak kohë më parë, në një kamion frigoriferik të parkuar në Esseks të Britanisë së Madhe u zbuluan trupat e 39 emigrantëve me origjinë Vietnameze të cilët kishin udhëtuar me ditë të tëra në kërkim të një jete më të mirë.