Presidenti i Kosovës, Hashim Thaçi ka paralajmëruar bashkimin e të gjitha forcave politike brenda Kosovës për arritjen e një marrëveshje me Serbinë.
Thaçi këtë paralajmërim e ka bërë pasi Sekretari i SHBA-ve, Mike Pompeo, paralajmëroi një miliard dollarë investime në Evropë për energji elektrike. Sipas Thaçit, me koordinimin ndërmjet SHBA-së dhe Evropës do të forcohet uniteti i aleatëve perëndimorë të Kosovës.
“Paralajmërimi i tij për një koordinim më të madh ndërmjet SHBA-së dhe Evropës do të forcojë unitetin e aleatëve perëndimorë të Kosovës, i cili në tri vjetët e fundit kishte munguar.
Ky unitet do të reflektojë edhe në bashkimin e të gjitha forcave politike brenda Kosovës, duke krijuar një bazë të fuqishme për tejkalimin e sfidave historike që janë para nesh”, ka thënë Thaçi.
Presidenti i vendit ka thënë gjithashtu se me unifikim e aleatëve të Kosovës duhet të arrihet marrëveshja me Serbinë.
“Bashkimi i aleatëve strategjikë perëndimorë të Kosovës, e bën të domosdoshëm përfundimin e procesit të dialogut ndërmjet Kosovës dhe Serbisë, duke projektuar të ardhmen e shtetit tonë, bazuar në paqen dhe stabilitetin afatgjatë në Ballkanin Perëndimor”, ka thënë ai.