Korriku i kaluar ishte i barabartë me muajin më të ngrohtë, në mos më të ngrohtë, njoftoi sekretari i Përgjithshëm i Kombeve të Bashkuara Antonio Guterres duke iu referuar të dhënave të reja nga Organizata Botërore Meteorologjike dhe Programi Kopernik.
“Sipas të dhënave më të fundit nga Organizata Botërore e Meteorologjisë dhe qendra e saj klimatike – temperatura në korrikun e kaluar ishte e barabartë me ose më e lartë se çdo muaj që kur ishin bërë matjet, paraprirë nga qershori më i nxehtë që nga ajo kohë”, tha Guterres.
Ai paralajmëroi që nëse nuk ndërmerren urgjentisht veprime për të lehtësuar ndryshimin e klimës, fenomene të tilla ekstreme të motit do të ishin vetëm maja e ajsbergut, transmeton KosovaPress.
“Dhe ky ajsberg po shkrihet gjithashtu shpejt. Shkencëtarët kryesorë globalë sugjerojnë që duhet të kufizojmë ngritjen e temperaturës në 1.5 gradë Celsius nëse duam të shmangim efektet më të këqija të ndryshimit të klimës. Duhet të ulim emetimet e gazit serë me 45 për qind deri në vitin 2030. Ne duhet të arrijmë neutralitetin e karbonit deri në vitin 2050. Ne duhet të përfshijmë rreziqet e klimës në të gjitha vendimet për të nxitur rritjen e qëndrueshme ndaj klimës, për të zvogëluar ndjeshmërinë ndaj ndryshimit të klimës dhe për të shmangur investimet që mund të shkaktojnë dëm edhe më të madh, “tha Guterres.
Njoftimi vjen gjithashtu si një prezantim i samitit të ardhshëm të vitit 2019 mbi Aksionin e Klimës në nivelin e tij më të lartë në shtator në selinë e Kombeve të Bashkuara në Nju Jork.
Sekretari i Përgjithshëm u bëri thirrje udhëheqësve të qeverive botërore, kompanive dhe shoqërisë civile që të vijnë në samit me plane konkrete – hapa të qartë për të forcuar kontributet kombëtare deri në vitin 2020 dhe strategji për neutralitetin e karbonit deri në vitin 2050.