Pandemia e koronavirusit e pati origjinën në Kinë, duke nisur nga fundi i dhjetorit. Ky është deri tani versioni zyrtar por që është kundërshtuar nga disa media kineze.
Ato i referohen deklaratës së një mjeku Milano i cili ka thënë se doktorët italianë “panë disa raste shumë të çuditshme pandemie” në fillim të nëntorit të vitit të kaluar.
Kaq është dashur që mediat shtetërore kineze si “The Global Times” dhe “CCTV” të lidhin origjinën e virusit me italinë dhe jo me Wuhanin.
Giuseppe Remuzzi, drejtori i institutit “Mario Negri” për kërkim farmaceutik i ka bërë këto deklarata për NPR.
“Doktorët mbajnë mend se kanë parë disa pneumoni shumë të çuditshme, shumë të rënda, sidomos te të moshuarit, në muajin dhjetor, madje edhe në nëntor. Kjo do të thotë se virusi po qarkullonte në Lombardi përpara se ne të mësonim për shpërthimin e tij në Kinë”, tha ai.
“Global Times” raportoi se “virusi mund të ketë qenë duke u përhapur në Itali përpara se të shpërthente në Kinë”. Megjithatë në një intervistë tjetër për kinezen “DeepTech”, profesori sqaroi se thelbi i deklaratave të tij ishte fakti se sa shumë ishte përhapur virusi përpara se të zbulohej, jo se nga erdhi. /Reporteri