Që nga shkurti i vitit 2022, pushtimi i Ukrainës ka qenë tema për Vladimir Putin. Tani tirani i Kremlinit ka gjetur një fushë tjetër beteje për të luajtur.
Sipas SHBA-së, Serbia e rreshtuar nga Rusia ka grumbulluar masivisht trupa në kufirin me Kosovën! Prishtina akuzoi Beogradin për avancimin e ushtrisë së tij drejt Kosovës “nga tre drejtime të ndryshme”.
Koordinatori për komunikime strategjike në Këshillin e Sigurisë Kombëtare të SHBA-së foli për një vendosje “të paprecedentë” të artilerisë dhe tankeve në kufi.
Qeveria federale i bëri thirrje Serbisë që t’i tërheqë trupat. Të shtunën, Ministria e Jashtme e Gjermanisë shkroi në X (ish-Twitter): “Nuk duhet të ketë përshkallëzim të mëtejshëm mes Serbisë dhe Kosovës. Është e rëndësishme që Serbia t’i reduktojë menjëherë trupat në kufi.”
Kryeministri i Kosovës, Albin Kurti ka kërkuar nga SHBA-ja ndihmë kundër “planeve të luftës” të Beogradit. Presidenti serb Aleksandar Vuçiq ndërkohë i përshkroi raportimet për vendosjen e trupave si “të pavërteta”.
Tensionet në rajon ishin përshkallëzuar javën e kaluar. Një grup komando serbë prej 30 personash të armatosur rëndë luftoi me policinë e Kosovës në Banjskë pranë Mitrovicës në veri të Kosovës. Në luftime u vranë tre sulmues serbë dhe një polic kosovar.
Përshkallëzimi i përgjakshëm pasoi vetëm disa ditë pas kolapsit të bisedimeve të BE-së që synonin të qetësonin mosmarrëveshjen në dukje të pafundme mes Kosovës dhe Serbisë. Kosova, e cila tani është pothuajse ekskluzivisht e banuar nga shqiptarët, u shkëput nga Serbia në vitin 1999 me ndihmën e NATO-s dhe shpalli pavarësinë në vitin 2008. Më shumë se 100 vende, përfshirë Gjermaninë, e njohin pavarësinë, por jo Serbia.
Edhe Rusia, e cila është aleate e Serbisë, nuk e njeh Kosovën.
A po fillon tashmë Putini luftën e ardhshme këtu?
Grumbullimi masiv i trupave të Serbisë mund të ketë pasoja për të gjithë Europën.
Rusia, veçanërisht luftënxitësi Putin, ka një interes të madh për përshkallëzimin, shkruan gazeta gjermane, Bild, përcjell Gazeta Express.
Eksperti i sigurisë në Ballkan, Agon Maliqi, analizon në revistën “Profil”: “Putini ka një interes të qartë për të krijuar tensione në Kosovë dhe për ta provokuar NATO-n”.
Anëtari i Bundestagut dhe eksperti ushtarak Roderich Kiesewetter (CDU) shkruan në X kjo situatë e pasigurtë “mund të shkaktojë lëvizje të mëtejshme të refugjatëve në Europën Qendrore”.
“Më në fund duhet të kuptojmë se Rusia nuk është e interesuar vetëm të shkatërrojë Ukrainën”, vazhdon Kiesewetter.
Gjuhë e thjeshtë: “Rusia duhet të ndalet, në Ukrainë, në Europë, në Afrikë dhe kudo ku ajo lë gjurmë gjaku”, tha Kiesewetter.
Në përgjigje të grumbullimit të trupave të Serbisë në kufi, NATO miratoi vendosjen e forcave shtesë të KFOR-it në rajon gjatë fundjavës. KFOR-i ka qenë përgjegjës për garantimin e sigurisë në vend që nga viti 1999. Sipas informacioneve të fundit, aktualisht ka rreth 4500 ushtarë nga 27 vende të NATO-s dhe shtete partnere. Gjermania së fundi mori pjesë në misionin e KFOR-it me rreth 80 ushtarë.