Anëtarë të Komisionit Republikan të Zgjedhjeve (RIK) në Serbi kanë ngritur shqetësime për parregullsi gjatë dorëzimit dhe kontrollit të materialeve zgjedhore në rrethin e Pçinjës, ku përfshihen Presheva, Bujanoci dhe Vranja.
Sipas diskutimeve në mbledhjen e RIK-ut, në Preshevë dhe Bujanoc janë konstatuar raste të ndërrimit të thasëve me material zgjedhor. Ndërkaq, në një vendvotim në Bujanoc raportohet se mungojnë 10 fletëvotime.
Sipas anëtarit të RIK-ut, Fadil Aliti, në një vendvotim në Bujanoc mungojnë 10 fletëvotime. Gjithashtu, dy kryetarë të këshillave zgjedhorë kanë marrë gabimisht thasët me material zgjedhor dhe më pas i kanë ndërruar mes vete.
Probleme janë evidentuar edhe në vendet e tjera të qarkut. Në Tërgovishtë janë gjetur dy fletëvotime më shumë, ndërsa në Vranjë është ngritur çështja e dorëzimit të materialit zgjedhor te zëvendëskryetari i këshillit zgjedhor, në vend të kryetarit.
Anëtarja e RIK-ut, Sofija Mandiq, ka paralajmëruar se këto raste ngrenë pikëpyetje mbi respektimin e procedurave zgjedhore dhe përputhjen e numrit të fletëvotimeve me evidencat përkatëse.
Sipas raportimeve të Nova.rs, është paralajmëruar kontrollimi i thasëve me material zgjedhor, për të verifikuar nëse përmbajnë të gjithë materialin e paraparë.
Deri në këtë fazë, bëhet fjalë për parregullsi të raportuara gjatë dorëzimit dhe kontrollit të materialeve zgjedhore, ndërsa përgjegjësia dhe ndikimi i tyre në proces mbeten për t’u sqaruar. /Preshevacom/
