Trupi gjykues në Las Vegas dënoi ish-liderin e bandës South Side Compton Crips për vrasjen e legjendës së repit amerikan
Gati 30 vjet pas vrasjes së reperit të njohur amerikan Tupac Shakur, drejtësia në Las Vegas ka dhënë verdiktin.
Një juri e ka shpallur fajtor Duane Keith Davis, ish-liderin e bandës South Side Compton Crips, për vrasjen e Shakurit, i cili u qëllua në Las Vegas në shtator të vitit 1996.
Juria mori rreth tre orë për të arritur në vendimin fajtor. Çështja u mbështet në masë të madhe në deklaratat dhe rrëfimet e vetë Davisit, i cili gjatë viteve kishte folur për përfshirjen e tij në ngjarje.
Davis, 63 vjeç, nuk akuzohej se kishte qëlluar vetë mbi reperin, por se kishte organizuar sulmin. Ai ishte arrestuar në vitin 2023, pas vitesh deklaratash për përfshirjen e tij.
Si ndodhi vrasja?
Tupac Shakur kishte marrë pjesë në një ndeshje boksi të Mike Tyson në MGM Grand në Las Vegas, së bashku me themeluesin e kompanisë së tij diskografike, Marion “Suge” Knight.
Më herët gjatë asaj mbrëmjeje, një përleshje kishte ndodhur mes shoqëruesve të Shakurit dhe Orlando “Baby Lane” Anderson, nipit të Davisit dhe anëtar i një bande rivale në Compton të Kalifornisë.
Sipas prokurorisë, pas përleshjes u organizua një sulm hakmarrës ndaj Shakurit.
Më 7 shtator 1996, Shakur dhe Suge Knight po udhëtonin me makinë në Las Vegas kur një Cadillac i bardhë u afrua pranë tyre, ndërsa automjeti ishte ndalur në një semafor. Nga makina u qëllua drejt tyre.
Shakur u godit nga katër plumba dhe, pas disa ditësh në spital, ndërroi jetë. Ai ishte vetëm 25 vjeç.
Davis kishte folur për përfshirjen e tij
Një pjesë e rëndësishme e provave kundër Davisit ishin deklaratat e tij të bëra ndër vite.
Prokurorët paraqitën rreth tetë orë regjistrime nga katër raste të ndryshme, në të cilat Davis kishte treguar versionin e tij për atë që ndodhi natën e vrasjes.
Në kujtimet e tij të publikuara në vitin 2019, Compton Street Legend, Davis pretendonte se kishte qenë në makinën nga e cila u qëllua dhe se kishte marrë me vete një pistoletë Glock të kalibrit .40.
Avokati i tij, Michael Sanft, argumentoi se deklaratat e Davisit ishin të ekzagjeruara dhe se ai kishte përfituar nga interesi i madh publik rreth një prej vrasjeve më të bujshme në historinë e muzikës amerikane.
Familja e Tupacut shpërthen në lot
Vendimi i gjykatës solli emocione të forta në sallën e gjyqit.
Motra e Tupacut, Sekyiwa “Set” Shakur, qau gjatë leximit të verdiktit, ndërsa djali i Davisit mbuloi fytyrën me duar.
“Ne kemi pritur 30 vjet për të vajtuar siç duhet”, deklaroi kushëriri i Tupacut, Zayd Akinyela, gjatë procesit gjyqësor.
Sipas tij, shumë familje nuk arrijnë të përballojnë plotësisht humbjen e një të afërmi derisa të kuptojnë se çfarë ka ndodhur dhe si ka ndodhur.
Davis pritet të dënohet në tetor
Gjykatësja e Qarkut Clark, Carli Kierny, ka caktuar seancën për shqiptimin e dënimit më 13 tetor.
Në Nevada, vrasja e shkallës së parë mund të dënohet me 20 vjet burgim deri në burgim të përjetshëm.
Prokuroria nuk kishte kërkuar dënimin me vdekje për Davisin. Pas verdiktit, ajo gjithashtu hoqi kërkesën për një masë shtesë të lidhur me përfshirjen në bandë.
Davis ka deklaruar se do ta apelojë vendimin.
Një mister që zgjati tri dekada
Vrasja e Tupac Shakur ka mbetur për dekada një nga misteret më të mëdha të historisë së muzikës.
Mungesa e një autori të dënuar për kaq shumë vite nxiti teori të shumta konspirative rreth vdekjes së reperit dhe personave që mund të kenë qenë të përfshirë.
Një rishikim i rastit nga Los Angeles Times në vitin 2015 kishte evidentuar edhe gabime të policisë gjatë hetimit. Autoritetet nuk kishin hetuar siç duhet disa pista, përfshirë informacione që mund të çonin te personat përgjegjës për të shtënat.
Tani, gati 30 vjet pas vrasjes, një gjykatë në Las Vegas ka shpallur fajtor personin që prokuroria e konsideron përgjegjës për organizimin e sulmit ndaj një prej figurave më të rëndësishme të muzikës rap.
