Më 13 Nëntor 2024, do të realizohet premiera e shfaqjes teatrore “Rri Ku Je”, një projekt unik dhe i rëndësishëm që është realizuar në kuadër të iniciativës “Teatër Laborator”, financuar nga Ministria e Kulturës, Rinisë dhe Sporteve të Republikës së Kosovës.
Ky projekt ka për qëllim të adresojë fenomenin e emigrimit të të rinjve nga Lugina e Preshevës, duke përdorur teatrin si një mjet për reflektim dhe ndërveprim social.
Shfaqja është rezultat i një procesi të gjatë kërkimor, i cili ka përfshirë intervista dhe rrëfime të jetuara nga anëtarë të komunitetit, duke eksploruar përvojat e tyre personale, motivimet për të emigruar dhe sfidat me të cilat janë përballur.
Këto histori janë përpunuar dhe janë shndërruar në një tekst dramatik, që do të sjellë në skenë ndjeshmërinë e individëve të prekur nga emigrimi dhe boshllëkun që ai lë në komunitetet e vogla.
Përmes metodës së Teatrit Laborator, shfaqja do të krijojë një eksperiencë interaktive për audiencën, duke ftuar pjesëmarrësit të reflektojnë mbi humbjen, braktisjen dhe transformimet që ndodhin në shoqëri pas largimit të të rinjve.” tha Valon Nuhiu, udhëheqës i projektit për PreshevaPRESS.
Shfaqja do të zhvillohet në një format të veçantë, duke inkurajuar një bashkëveprim të drejtpërdrejtë midis aktorëve dhe audiencës, duke krijuar një përvojë që do të mbetet në kujtesën e të rinjve dhe të gjithë të pranishmëve.
“Përmes këtij projekti, të rinjtë e Luginës së Preshevës do të kenë mundësinë të shprehin veten, të diskutojnë dhe të reflektojnë për sfidat dhe mundësitë që kanë përpara, si në vendin e ri të emigrantëve, ashtu edhe në atdheun e tyre.” shpjegon Nuhiu.
Premiera do të mbahet më 13 Nëntor 2024 dhe ftohen të gjithë ata që janë të interesuar të jenë pjesë e kësaj ngjarjeje kulturore të rëndësishme. Ky është një projekt që synon të krijojë një përvojë teatrale dhe edukative që do të prekojë zemrat dhe mendjet e të rinjve, duke nxitur biseda dhe reflektime me vlerë shoqërore.
