Gjatë seancës së parë të Kuvendit të Komunës së Preshevës për këtë vit, këshilltari i Partisë për Veprim Demokratik, Munir Rexhepi, ngriti shqetësime lidhur me mënyrën e menaxhimit të komunës, me theks të veçantë në funksionimin e Administratës Komunale dhe procesin e prokurimeve publike.
Në fjalën e tij, Rexhepi kritikoi edhe drejtuesit e drejtorateve komunale, të cilët, sipas tij, nuk iu përgjigjën ftesës për të raportuar para Kuvendit Komunal, ndonëse një gjë e tillë përbën obligim ligjor dhe është e rëndësishme për transparencën dhe llogaridhënien institucionale.
Një pjesë e diskutimit të tij iu kushtua procesit të prokurimeve publike, për të cilat ai shprehu pakënaqësi, duke vlerësuar se mënyra e realizimit të tyre po ndikon negativisht në zhvillimin e komunës. Sipas Rexhepit, mungesa e transparencës dhe struktura e prokurimeve janë ndër arsyet kryesore të kësaj gjendjeje.
“Para ksaj seance kemi folur shume per prokurimet publike, dhe Samia e permendi transparencen. Pikerisht eshte tranasparenca e cila e vlereson punen e juaj, te Administrates Komunale, sepse jane 92 prokurime publike me vlere nen 3 milion, derisa 10 permes portalit, qe nenkupton qe jemi zgjedhur komuna e fundit per transaprence.” tha Rexhepi.
Ai gjithashtu theksoi se, sipas vlerësimeve të tij, në dy vitet e fundit nuk është realizuar asnjë projekt i rëndësishëm, duke kërkuar më shumë përgjegjësi dhe transparencë nga institucionet komunale në menaxhimin e fondeve publike dhe realizimin e projekteve në interes të qytetarëve.